دى أشكال تنتخبوهايا مصريين

يا شعبى العظيم المناضل.. أنا زعلانة منك قوى والله.. كلما تكررت هذه الظواهر لا أجد غيرك لألومه.. وذلك فى محاولة منى للاستهبال.. قال يعنى أنا مش منك ولا محسوبة عليك.. فأنت يا شعب السبب فى كل البلاوى.

فى عيد الأم الماضى وصلتنى رسالة من واحد صاحبى «أمى بتسلم عليكى وبتقولك.. دى أشكال تخلفوها؟».

الظواهر التى أتحدث عنها تكمن فى هؤلاء الذين تنتخبهم أنت يا شعب ليمثلوك فى المجلس الموقر.. مش كلهم طبعاً.. ساعات ربنا يهديك وتختار صح.. لكن يبدو إن الساعات دى قليلة شوية.. ما بتسنحش كتير يعنى.. وإلا لما تكررت الظواهر.. يعنى كل شوية تحصل أزعرينة سببها واحد من اللى إنت انتخبتهم.. مرة يطلع هربان من التجنيد.. ومرة هربان من الضرايب.. ومرة بيتاجر فى الممنوع.. ومرة فى الدم الفاسد..

وإشى بلاغ كاذب وتعكير أمن سلطات وإشاعة البلبلة والفوضى.. وطلبات إحاطة فشنك أو مالهاش علاقة بمهمته الأساسية فى المجلس.. وقضايا رأى عام تضيّع وقت الدولة والنيابة والقضاء وتنزل على فش تش.. وشوية استيلاء على أموال العلاج على نفقة الدولة.. وشوية يتدخلوا فى الفن دون فهم.. وشوية فى الكورة.. واللى بينفذوا توجهات ممنوعة أو محظورة..

واللى غاويين شهرة وبيطلعوا فى التليفزيون يدوشونا وخلاص.. واللى يطلع ماشى فى الزفة الانتخابية وهو حاطط دراعه أنجاجيه فى دراع قتال قُتلا.. واللى متورط فى سلاح.. واللى قضايا عاطفية.. واللى قتل.. واللى واخد قروض ومش مسدد ومتحامى فى الحصانة.. واللى يطلع يضربله تصريحين يخبّط فيهم فى أهل الفن والثقافة ويتهمهم بالقوادة وقلة الأدب..

واللى يدور عليه يلاقيه بيدافع عن فئة هو لا يمثلها البتة وكل علاقته بيها إنه كان بيحضر جن وعفاريت وضاحك على باقى الأعضاء ومفهمهم إن اللى مش حايسمع الكلام ويمضى الطلبات هايعزّم عليه ويلبسه جن زقنطط كده يعفرت أهله.. ده غير الصويت والزعيق والردح والتشليق وفرش الملاية ورفع الصرم على بعض تحت القبة.

وكله منك يا شعب.. وعلى رأى صاحبى: دى أشكال تنتخبوها؟؟.. ده فيه ناس ياشعب مالهاش شغلانة غير النداء اليومى بالديمقراطية.. والديمقراطية هى الحل.. وكل ما أسمع الكلام ده أحط إيدى على قلبى.. مانت اللى جايبلنا الكلام يا شعب.. ديمقراطية إيه بقى وانت اختياراتك عاملة كده؟..

المفروض فى الحملات الانتخابية تدرس البرنامج بتاع المرشح اللى هاتنتخبه عن الدايرة اللى انت فيها عشان تعرف حايعملك إيه.. ده إذا كان بيعرف يكتب أصلاً مش ضارب شهادة الابتدائية من ضمن ما هو ضارب.. بس انت ولا بتدرس ولا نيلة.. فى إحدى الحملات الانتخابية نزلت أحاول ألعب دورى معاك.. مانا شعب برضه.. لقيتك جايب فرقة مزمار بلدى ومتحزم وعمال ترقص وتهتف بالروح بالدم.. ما فهمتش إيه العلاقة بين الروح والدم والترقيص وندهت عليك: يا شعب.. تعالى يا حبيبى.. إنت بتترقص ليه يا بابا؟..

قلتلى أصل الراجل اللى هناك ده بيوزع.. قلتلك بيوزع إيه يا حبيب ماما؟.. قلتلى ورقتين بمية وتوب يفط.. يعنى إيه توب يفط؟.. قلتلى ما إحنا عرفنا بقى اليفط الكتير دى بتروح فين بعد الانتخابات.. فين يا ضنايا؟..

قلتلى ما قالها عمرو عبجليل فى «حين ميسرة»: بنفصل منها كلاسين.. قال يعنى مؤدب وماقالش الكلمة التانية.. سألتك طب وانت عارف العضو ده حايعمل إيه لما يخش المجلس.. قلتلى طبعاااااااا.. هايقدم الطلبات اللى إحنا محضرينهاله ويمضّى عليها الوزرا جوه الجلسة بدل ما هما قاعدين بيقزقزوا لب ويلعبوا على التليفونات السلم والتعبان..

أهه الأستاذ اللى هناك ده حايفتحلنا بقى حارة الصناديلى م اليمة التانية فماتبقاش سد.. وحايخللى الصرف الصحى يسلك المصرف اللى ف ريحنا.. وحايطلع ناس عمرة.. ويجيبلنا شوية علاج فى القومسيون.. وحايرخص التوك توك وينمره.. وحايجيب جهاز غسيل كلى بدل اللى عطلان فى الوحدة.. وحايعشينا فتة آخر الليل أول ما الصناديق تتكفى على بوزها وينجح.

يا بنى يا شعب دى مش شغلته.. مش مفروض يعمل الكلام ده خالص.. المفروض إنه يراقب الحكومة ويعجل بإصدار التشريعات اللى بقللت ودهننت فى المجلس دى.. ويشرف على الأداء عشان الوزارات والهيئات هى اللى تعمل الكلام ده للناس كلها.. مش كل دايرة وبختها.. مش شغلته يسرح زى بياعين البطاطا جوه المجلس يسلك مزاريب مسدودة ويحظ شوية ناس عن ناس تانية حسب البخت والقرعة ودعا الوالدين.. العدل لازم يعم الجميع يا شعب.. ده دوره الحقيقى فى المجلس الموقر.. فيه ناس بتعمل كده ومفحوت قلبها عشان تحقق المعادلة دى.. بس يروحوا فين وسط العالم اللى انت بتزيطلهم دول؟

الانتخابات قربت يا شعب.. كن واهجع كده وصلى على حبيبك النبى.. وفكر واستدبر شوية.. الأفندى اللى هناك ده اللى إنت حتى مش حافض اسمه.. بيدينى الورقتين أم مية ليه؟.. بيصرف الفلوس دى كلها ليه؟.. إوعى تقوللى عشان جمال عينيك.. بص فى المراية شوية عشان تعرف إن عينيك معفية م الجمال.. فكر شوية.. لما يصرف تلاتين وأربعين مليون جنيه على اليفط اللى هاتتحول لكلاسين دى.. مش هايرجعوله؟.. طب هايرجعوله إزاى وليه؟.. منين يعنى؟

أمانة عليك يا شعب.. حلفتك بسيدك النبى عليه ألف صلا.. وحياة الحاجة اللى راقدة على جنبها فى البيت دى يا شيخ.. والعيال اللى انت بتخلفهم وترميهم فى وشنا وعاوز تعلمهم وتربيهم دول.. تختار ناس متعلمة يا بابا.. ناس م اللى بيقروا كتب تخينة فى العلم والقانون والفلسفة والاجتماع والاقتصاد مش فى حاجة تانية.. ناس عايزة تعدى بينا لبر الأمان مش تكومنا فى العبارة اللى بتتقسم نصين فى عرض البحر.. ناس تخلصنا م التخلف والرجعية والبطء فى إصدار القوانين العادلة اللى تنصفنا.. ناس يعرفوا يدخلونا بوابة العالم المتقدم.. لحسن الخواجات اللى بره دول قربوا يفرشونا ع الأرض زى الحصر ويتمشوا علينا.. بس للأسف بقى.. مش حايكونوا حافيين.